طريقة عمل البيتيفور

بيتيفور deluxe ⁦❤️⁩

وصفه ممتازه ناعم و هش بيدوب فى البق و خفيف خفه حكايه 

 بمناسبه أنه حكايه هقولكم حكايه البيتيفور أو

 "Petits Four"

الكلمه فرنسيه طبعا و معناها الفرن الصغير زى ماهو واضح بس الاصل فى الوصفه انها ايطاليه و موجوده لحد دلوقتى و البيتيفور فرع كامل من Italian butter cookies  و فيه كتب متخصصه فى البيتيفور و أنواعه فقط سواء باللغات الايطاليه أو الفرنسية

المهم مره حلوانى فرنسى استخسر يسيب الفرن الحجر سخن عالفاضى لأنه كان بياخد وقت طويل جدا على مايبرد  فهو حب يستغل الوقت والحراره دى فى حاجه فحط باقى عجين كوكيز معاه و سابه و زى كل الصدف السعيده لقاه استوى عالهادى وبقى ناعم و جميل جدا و اعتمد طريقه التسويه عالهادى دى علشان كده سماه الفرن الصغير يعنى مش محتاج نار اوى زى باقى الحاجات 

نبدا بقى وصفتنا فانليا و شوكولاته بكل تفاصيلها ركزى معايا

💥💥ملحوظه ضرورية جدا جدا الزبده اللى استعملتها نيوزلاندى ممتازه الكيلو ب130 جنيه ، متستعمليش انتى بقى ام 20 جنيه و تقوليلى وصفتك مش عارف مالها 

زى ما هتحطى حبيبتى فى حاجتك زى ماهتطلع ....... أو متطلعش ماليش دعوه ✋

المقدار ده طلع كيلو و ربع بيتيفور بعد الحشو بمربى و التزيين بشوكولاته و سبرينكلز 😋

المقادير :

400 جرام زبده نيوزلاندى صفرا ممتازه ، مينفعش تسيحيها علشان تعايريها بالكوب خلى المحل يوزنلك لو معندكيش ميزان

400 جرام دقيق يعنى 3 وتلت اكواب دقيق أنا استعملت الضحى

160 جرام سكر بودره منخول كوب وتلت ،بردو الضحى متطحنيش فى البيت مش هينفع والله 

160 جرام نشا كوب و ربع و معلقه صغيره 

4 صفار بيض و فانيليا كتشييير 

الطريقه : 

عنها الدقيق و النشا سوا و اديهم ذره ملح واسيبهم على جنب

احط الفانيليا على صفار البيض و اسيبهم على جنب

اجيب الزبده الطريه و طريه هنا يعنى احط عليها صباعى يعلم  لا جامده ولا سايحه ميه ، النهارده الحراره فى مطبخى كانت 48 لو سيبت الزبده فيها تحت شعار حراره الغرفه هتبقى شوربه ،طبعا دخلتها التلاجه شويه تتماسك 

لما تبقى الزبده مظبوطه فى التماسك بضربها بالسكر البودره المنخول على اول سرعه دقيقه واحده و بعدين اضرب على اعلى سرعه لحد ما تبيض خالص و تبقى كريمه بالظبط 4 دقايق

بعد كده اضيف صفار البيض مع الفانيليا و اضرب على سرعه متوسطه لحد ما يدوب فى بعضه و بعدين انزل بالدقيق و النشا المنخولين و اضرب على أقل سرعه لحد بس ما كله يتجانس و تحطه فى كيس حلوانى 

و أشكل المقدار فى صاجات حوافها قصيره مش عاليه مفروشه ورق زبده بالقمع والشكل اللى يعجبك و حاولى تد ماتقدرى تخلى كله نفس الحجم و لو هتعملى اكتر من شكل خلى العدد زوجى علشان هنلزقهم فى بعض

الخبز بيكون على حراره 180 لمده 10-15 دقيقه حسب فرنك هى بتاخد اول اللون الذهبى كده انا اعتبرها تمام ، فيه ناس تحبها تتحمر اكتر و ماس تقول لازم يفضل ابيض خالص هى إذواق بس اول اللون الذهبى يبقى شكل و طعم و دوبان و هششان مالوش حل

🤓 نصيحه اخبزى واحدتين تلاته الاول اختبار اتاكدى أنه تمام معاكى و بعدين كملى باقى المقدار

-لو الاختبار كان عجينه جامده مش راضيه تنزل من كيس الحلوانى يبقى محتاج معلقه. حليب 

-لو كان تمام فى الكيس بس فرش فى الفرن يبقى محتاج معلقه دقيق

الحركه دى بتنقذ مجهودك كله و الكميه كامله متستهونيش بيها ابدا

بسيبه يبرد خالص بقى و بعدين امسك كل اتنين اشوف الى اد بعض احطهم مع بعض و بعدين الزقهم سوا بمسحه خفيفه جدا مربى مشمش أو مربى برتقال دول احسن طعمين فى البيتيفور، الفراوله مش حلوه فى البيتيفور للاسف ولا باقى الانواع ، بعد كده بسيح شوكولاته و اغطس طرف كل جوز من البيتيفور الملزوق فى بعضه و اغطسها تانى فى سبرينكلز ملون ، ممكن تستعملى جوز هند مبشور أو مكسرات أو فارمسيل شوكولاته أو حتى تسيبيها بالشوكولاته ساده انتى و ذوقك زى ماتحبى

نيجى للبيتيفور الشوكولاته بقى مقداره هيطلع كيلو وربع بردو بس هيختلف شويه فى المكونات

المكونات : 

400 جرام زبده طريه

160 جرام نشا

170 جرام سكر بودره 

75 جرام كاكاو خام نوعيه جيده انا استعملت هنتز الألمانى

320 جرام دقيق منخول

4 صفار بيض و فانليا و ذره ملح

احتمال يحتاج معلقه حليب و ممكن ميحتاجش حسب الكاكاو انا هنا محتاجتش 

هننخل الكاكاو مع الدقيق والنشا و نعمل نفس اللى عملناه فوق بالترتيب

ملحوظه انا بحط واحده بيتيفور فانليا فى كل صاج بيتيفور الشوكولاته علشان اعرف الخبز و السوا مظبوط ولا ايه لان الشوكولاته مش بتبان و سهل اوى تنشف فى الفرن 

الوصفه دى ممتازه جدا و مظبوطه انا عملتها 4 مرات خلال اليومين دول

**** سمعتك 😉 لا مافيهوش بيكنج بودر *****

**بياض البيض بينشف البيتيفور الصفار بينعمه**